Орусиядагы мектептердин биринде оорулуу классташынын операциясы үчүн 4-класстын окуучулары жаңы жылдык белектен баш тартышты

Эски Оскол (Орусия) шаарындагы №24-орто мектептин 4-классынын окуучулары оорулуу классташынын операциясына акча чогултуу үчүн жаңы жылдык белектен баш тартышты. Бул тууралуу жергиликтүү басылмалар жазат.

Классташтары акча чогултуп жаткан баланын эмнеден жабыркаары тууралуу так диагнозу жок. Белектерден баш тартуудан тышкары аталган мектепте жарманке уюштурулуп, ага балдардын ата-энелери жана мугалимдер катышкан.

Окуучулардын арасынан көп суммадагы акча алып келген окуучу мугалимдерде күмөн жаратып, алар мынча акчаны кайдан тапканына кызыгып сурап көрүшкөн. Белгилүү болгондой, ал окуучунун көптөн бери велосипед сатып алам деп чогултуп жүргөн акчасы болгон. Чогултулуп жаткан акчага ал сактап жүргөн каражатын алып келип кошкон.

Мындан тышкары окуучулар оорулуу классташы үчүн тапшырмаларды аткарышып да жардам беришет. Окуучулардын бири жаттап келүүгө берилген ырды өзү үчүн, ал эми ооруп келбей жаткан классташы үчүн башка дагы бир ырды жаттап келип айтып берген.