Мурдагы премьер-министр Сапар Исаковдун тергөө мөөнөтү 2019-жылдын 13-февралына чейин узартылды

Бишкек шаарынын Биринчи Май райондук соту мурдагы премьер-министр Сапар Исаковду 2019-жылдын 13-февралына чейин камакта калтыруу чечимин чыгарды. Бул маалыматты Жогорку Соттун басма сөз кызматы SUPER.KG'ге тастыктады.

"Исаковдун тергөө мөөнөтү 13-февралга чейин узартылды", - деди басма сөз кызматы.

Белгилей кетсек, буга чейин Бишкек шаардык соту Биринчи Май райондук сотунун Исаковду 5-январга чейин камакта калтыруу чечимин күчүндө калтырган болчу.

Ага чейин райондук соттун бул чечимине каршы болгон тарап шаардык сотко арыз жазган.

Окуянын чоо-жайы:

29-майда Сапар Исаковго карата Бишкек ЖЭБине байланыштуу козголгон "коррупция" беренеси боюнча айып тагылган. 5-июнда эки айга камакка алынган. 31-июлда анын абактагы тергөө мөөнөтү дагы эки айга узартылган.

1-октябрда Бишкектин Биринчи Май райондук соту мурдагы премьер-министр Сапар Исаковдун тергөө абагында калуу мөөнөтүн 5-декабрга чейин узарткан.

Сапар Исаков бул окуя боюнча суракка келип жүргөн учурунда журналисттерге "саясий куугунтук болуп жатат" деп айткан.