Футбол боюнча Кыргыз улуттук курама командасы Палестина курамасын жеңип алды

Бүгүн, 31-декабрда футбол боюнча Кыргыз улуттук курама командасы Палестина курамасы менен беттешип, кыргыз футболчулары 2:1 эсебинде жеңишке жетишти. Бул тууралуу футбол федерациясы кабарлады.

Белгилүү болгондой, оюн Катар өлкөсүнүн Доха шаарында "Qatar SC Stadium" стадионунда орун алды.

Беттеш Азия Кубогуна даярдануу максатындагы өткөрүлүп жаткан окуу-машыгуу жыйындарынын алкагында өттү.

Оюн эки тараптын келишими боюнча жабык тартипте көрүүчүлөр жана журналисттерсиз өткөн.

Кыргыз улуттук курама командасы 7-декабрдан тарта Катарда окуу-машыгуу жыйындарын өткөрүп жатат. Кыргыз футболчулары 20-декабрда Иордания менен беттешип, 1:0 эсебинде жеңип алса, 26-декабрга караган түнү Катар өлкөсүнө 0:1 эсебинде жеңилип калган.

Азия Кубогу Бириккен Араб Эмираттарында 5-январда башталып, 2-февралда жыйынтыкталат. Кыргыз курама командасы С тайпасында Түштүк Корея, Кытай жана Филиппин курамалары менен беттешет.