Ош шаарындагы жаңы жылдык майрамдан фоторепортаж

Ошто жаңы жылдык майрамга 15 миңге жакын адам күбө болду. Бул тууралуу мэриянын басма сөз кызматы билдирди.

Ош шаарында Жаңы жыл майрамы шаардын борбордук аянтында балдар үчүн даярдалган жомоктордон кыскача үзүндү, Аяз ата, Аяз кыздардын парады оюн-зоок, концерттик программа, спорттук жарыштар менен башталды.

Кечеге шаар мэри Таалайбек Сарыбашов жетектеген мэриянын өкүлдөрү, шаардык кеңештин төрагасы Жапарбек Ормонов, мекеме ишканалардын жетекчилери, шаардын тургундары жана меймандары катышты. Шаар жетекчиси жалпы кыргыз элин Жаңы жыл майрамы менен куттуктап сөз сүйлөдү.

Андан соң Ош шаарынын мэриясы тарабынан жаңы жылдык майрамга карата шаар тургундары жана мекеме-ишканалар арасында жарыяланган кароо-сынактардын жеңүүчүлөрүнө баалуу белектер тапшырылды.

Саамалык белгилүү эстрада ырчылары жана фольклордук топтор тарабынан даярдалган концерттик программа менен коштолуп, майрамдык фейерверктер атылды.