Ажылык сапарга бара тургандарды каттоо 9-январда башталат

Ажылык сапарга баруучуларды каттоого алуу биометрикалык паспорттун негизинде 2019-жылдын 9-январында башталып 31-январга чейин жүргүзүлөт. Бул тууралуу муфтияттан билдиришти.

Маалыматка караганда, талапкерлерди каттоо Кыргыз мусулмандар дин башкармалыгынын облустук, шаардык жана райондук бөлүмдөрүндө жүрөт. Ажылык серверге аймактык кезекке тургузуу бир гана алгачкы төлөгөн 500 АКШ доллар квитанциясынын негизинде болот.

ЭЛЕКТРОНДУК КАТТООГО КАТЫША ТУРГАН АЖЫГА БАРУУЧУЛАРГА КОЮЛГАН ТАЛАПТАР:

1. 2019-жылы ажыга каттоо тартиби бир гана биометрикалык ID-карт паспорттун негизинде жүргүзүлөт.
2. Ажылык наркынын ичинен алдын ала банкка 500 АКШ долларын төлөгөндүгү тууралуу квитациянын түп нускасы.
3. Ажыга катталуу үчүн кайтарымсыз төлөмдүн банкка төлөнгөн суммасынын (700сом) квитациясынын түп нускасы.
4. Ажыга баруучунун жашаган жериндеги каттоого алынган убактысы 2018-жылдын 10-августуна чейин болушу шарт.
5. Жалпы жарандык паспорт.

• Биометрикалык паспорт менен жалпы жарандык паспорт бир баракка көчүрүлүүсү зарыл.
• Жалпы жарандык паспорттун мөөнөтү 2020-жылдын 31-январына чейин бүтсө жараксыз.

6. Аялдар менен туугандарынын бири баруусу шарт.

• Күйөөсү менен барса нике күбөлүгү, ал эми башка тууганы менен барса туулгандыгы тууралуу күбөлүк талап кылынат. 1974-жылы май айында төрөлсө туулгандыгы тууралуу күбөлүк же нике күбөлүгүнүн көчүрмөсү талап кылынат, ал эми июнь айында төрөлсө документинин түп нускасы талап кылынат.

7. 3х4 көлөмүндөгү 4 даана сүрөт.

• Сүрөт түстүү, ак фондо, жылтырабаган (матовый) кагазда болуусу шарт.
• Аялдар үчүн сүрөткө ак жана кара жоолук ал эми эркектер ак көйнөк жана ак баш кийим менен түшкөнгө болбойт.
• Фотошоп программасы менен оңдолуп-түзөлгөн сүрөттөр жараксыз деп таанылат.

8. №086 формасындагы медициналык тактама.

• Ажыга баруучунун ID-карт паспортунда көрсөтүлгөн колу гана жарактуу

9. Келишимге кол койдуруу жана Ажылык серверге киргизүү (ID-карт паспортунда көрсөтүлгөн колу гана жарактуу болот).
10. Ажылык визасын алуу үчүн анкетага кол коюу (Жалпы жарандык паспортунда көрсөтүлгөн колу гана жарактуу болот).
11. Ажыга баруучунун кийиминин өлчөмү жана жеке телефон номери, каттап жаткан операторго берүүсү талап кылынат.
12. Ажылыкка баруучу жарандын жашы 18ден төмөн болбоосу шарт (2019-жылы 18 жашка толуучу жарандар ажыга барууга укуктуу).
13. Сауд Арабия падышалыгы тарабынан же ажылык базасынан виза алуу учурунда, мурда ажыга барган талапкерлерге калькуляциядан тышкары кошумча төлөмдөр пайда болсо каражатты ажыга баруучу талапкер өзү төлөөгө милдеттүү.