Таластагы үлпөт кортежинде "автомат алып жүрүшөт" делген жарандар суракка алынды. Милиция "автомат базардагы 300 сомдук оюнчук" дейт

Үйлөнүү үлпөт тоюнда уюштурулган кортежде колдоруна курал сымал нерселерди алып, унаанын терезесинен белине чейин чыгып алып көчө кыдырган адамдардын интернетке тараган видеосу тууралуу милиция билдирүү таратты.

Окуя Талас облусунун аймагында болгон. Талас ОИИБинин басма сөз кызматкери Динара Сарногоеванын айтымында, окуя өткөн жылдын ноябрь айында болуп, ал эми жарандардын колундагы автомат делген нерсе оюнчук экени аныкталган.

"Видео тарагандан кийин иликтөө иштеринин алкагында, аталган үйлөнүү тою 2018-жылдын 24-ноябрында болгону аныкталды. Милиция кызматкерлери унаадагы кортеждин айрым катышуучуларын таап, суракка алышкан. Алар үйлөнүү тоюн видеого тартуу иштеринде кадр кооз чыгышы үчүн ошондой кадамдарга барышканын айтышты. Ал тургай автомат сындуу буюмду да алып келишкен. Ал базарларда сатылган 300 сомдук автомат оюнчуктар болуп чыкты. Унааны башкарып бараткан айдоочулардын жана тартип бузганга катыштыгы бар адамдардын баарын Талас облусунун аймагынан табуу мүмкүн болбой жатат. Анткени тойго башка аймактардан келген коноктор да бар. Ошентсе да жүрүп бараткан унаанын терезесинен белине чейин чыгып отуруп алышканы үчүн тиешелүү адамдарга административдик чаралар көрүлүүдө. Ал эми видеону монтаждап тараткан адамдар табыла элек", - деди Сарногоева.

Кечээ жакында эле интернетке тарап, талкуу жаратып жаткан видеодо үлпөт тойдун кортежинде белгисиз адамдар автомат сындуу нерсени алып унаанын терезесинен чыгып алганы тартылган. Басма сөз кызматынын айтымында, видеодо чыккан автоматтын үнү монтаждалып кошулган. Учурда иликтөө иштери уланууда.