Азия Кубогу: Кыргыз улуттук курама командасы Кытайга жеңилип калды. Павел Матяш 2 жылдын ичинде 4 жолу ката кетирип, команданын үмүтүн актабай жатат

Бүгүн, 7-январда Бириккен Араб Эмираттарынын Аль-Айн шаарында Кыргыз-Кытай беттеши орун алууда.

Беттеш Халифа Бин Зайед атындагы стадиондо өтүп жатат. Беттеш Бишкек убактысы боюнча саат 17:00дө старт алат.

16:30. Кыргыз курама командасынын курамы белгилүү болду. Оюн талаасына алгачкы мүнөттөрдө төмөнкү 11 оюнчу чыгат.

Дарбазачы: Павел Матяш;

Коргоочулар: Валерий Кичин, Тамирлан Козубаев, Даниэл Тэго;

Жарым коргоочулар: Эдгар Бернхардт, Бекжан Сагынбаев, Фархат Мусабеков, Кайрат Жыргалбек уулу, Ахлидин Исраилов;

Чабуулчулар: Виталий Люкс, Мирлан Мурзаев.

16:50 Командалар оюн талаасына чыгууга даяр болушту. Беттеш 10 мүнөттөн кийин башталат.

16:53. Командалар оюн талаасына чыгышты. Кытай курама командасы кызыл формачан болсо, Кыргыз футболчулары ак түстөгү формачан.

16:55. Кытай өлкөсүнүн гимни жаңырууда.

16:57. Кыргыз мамлекетинин гимни жаңырып, беттеш башталуу алдында турат.

16:58. Белгилей кетсек, бул беттеште эки мамлекеттин тең күйөрмандары бар. Кыргыз күйөрмандардын саны 100дөн ашат.

16:59. Беттештин башкы калысы Бириккен Араб Эмираттарынан Мохаммед Абдулла Хассан болот.

17:00. Калыс ышкырыгы менен беттешке старт берди. Топту оюнга Кытай курамасы кошту.

17:01. Алгачкы чабуулда Виталий Люкс дарбазачы менен бетме-бет келүүгө мүмкүнчүлүк алган. Бирок Люкс ага узатылган топко жетпей калды.

17:04. Кытай командасынын оюнчулары оюн эрежесин бузушту. Топ кыргыз футболчуларында.

17:05. Бекжан Сагынбаев эсеп санын ачууга жакын болду. Мурзаев Бекжанга топту чыгарып берип, Сагынбаев сокку узатууга жетишпей калды.

17:08. Кытай курама командасы чабуулга чыгып, сокку узатканга чейин барды. Бирок Павел Матяш топту тосуп алды.

17:14. Кыргыз курама командасы уламдан-улам чабуулда мыктылыгын көрсөтүп жатат. Сагынбаев, Мурзаев, Жыргалбек уулу жана Люкс соккуларды узатканга үлгүрүп, бирок таамай боло алышкан жок.

17:15. Мирлан Мурзаевге каршы оюн эрежеси бузулуп, Кыргыз курамасы айып сокку аткарат.

17:17. Кичин мыктылыгын көрсөтүүдө. Дарбазаны сак калтыруу максатында өзүн аябай денеси менен соккуларды тосуп алууда.

17:22. Фархат Мусабеков дарбазанын жанында атаандашынын чабуулун токтотуп койду. Бирок топ азырынча Кытай тарапта.

17:23. Тэго топту эреже бузбай алып койгону менен, кытайлык футболчу жерге кулап айып сокку талап кылууда.

17:24. Оюн уланды. Топ кыргыз футболчулардын карамагында калып, чабуулга чыгууда.

17:26. Виталий Люкс мыкты мүмкүнчүлүктү колунан чыгарды. Мирлан Мурзаев айып аянтчанын ичине топту өткөрүп берип, дарбазачы менен бетме-бет чыккан Люкс таамай боло алган жок.

17:30 Кытай курамасынын оюнчулары 2 ирет кооптуу чабуул жасаганга жетишти. Чабуулдары сокку менен аяктаганы менен, таамай болгон жок. Азырынча кыргыз футболчулары ийгиликтүү чабуулга чыга албай жатышат.

17:33. Кыргыз футболчулары чабуулга чыгып, топту бурчтан көтөрүүгө мүмкүнчүлүк алды.

17:34. Бурчтан көтөрүү ийгиликсиз болуп калды. Топ Кытай курама командасынын карамагына өттү.

17:35. Оюндун орто бөлүгүндө Фархат Мусабековго каршы оюн эрежеси бузулду.

17:38. Кайрат Жыргалбеков оң канаттан чабуулга чыгып, топту айып аянтчага көтөрүп берди. Топко алгачкылардан болуп Бекжан Сагынбаев жетти. Ал топту Люкска чыгарып, таамай боло албай калды.

17:42. ГОООООООООООЛ!!!!! Эсеп саны 1:0. Ахлидин Исраилов Кыргыз курама командасын алдыга чыгарды.

17:43. Виталий Люкс дарбазачы менен бетме-бет келип, таамай боло албай калды. Люкс жакшы мүмкүнчүлүк менен колдоно албай калды.

17:44. Мирлан Мурзаев сол канаттан топту кабыл алып, бирок офсайд абалында болуп калды.

17:45. 1-таймдын негизги убактысы аягына чыгып, калыс дагы 1 мүнөт кошуп берди.

17:46. Калыстын ышкырыгы жаңырып, алгачкы тайм аягына жетти. 15 мүнөттүк тыныгуудан кийин 2-тайм башталат.

18:01. Беттештин 2-таймы башталды.

18:03. Мирлан Мурзаев топту орто бөлүктөн алып, алдыдагы Виталий Люкска өткөрүп берген, бирок Люкс топко жетпей калды.

18:04. Кайрат Жыргалбек уулуна каршы оюн эрежеси бузулду. Кыргыздар айып сокку аткарат.

18:05. Айып соккуну Бернхардт аткарып, анын чыгарып берүүсү таамай болбой калды. Кытай курамасы чабуулда.

18:06. Кытай курама командасы бурчтан көтөрүү мүмкүнчүлүгүн алды.

18:07. Гол! Эсеп 1:1. Бурчтан көтөрүлгөн топту Павел Матяш айып аянтчадан чыгарам деп өз дарбазасына киргизип алды.

18:09. Эсеп саны тең болгондон кийин кыргыз футболчуларынын оюну бузулуп жатат. Чабуул жана коргоо бөлүктөрү ийгиликсиз болууда.

18:12. Жыргалбек уулу оюн эрежесин бузуп, сары айып кагаз менен белгиленди.

18:14. Кытай курама командасы айып соккуну аткарып, кооптуу соккуну Матяш тосуп алды.

18:15. Кытайлыктар оюн эрежесин бузду. Бернхардт айып сокку аткарат.

18:16. Бернхардттын чыгарып берүүсүнө чуркап барган кыргыз футболчулар офсайд абалына түшүп калып, топ кытайлыктардын карамагына өттү.

18:17. Кыргыз курама командасында оюнчулар алмашты. Исраиловдун ордуна оюнга Антон Землянухин кошулду.

18:19. Кытайлыктар кооптуу чабуул жасоого үлгүрүштү. Кытайлык футболчунун соккусу тактанын үстүнөн өтүп кетти.

18:20. Виталий Люкс сол канаттан чабуулга чыгып, топту айып аянтчага көтөрүп берди. Топ Землянухинге жетип, анын узаткан соккусу таамай болбой калды.

18:27. Кытай курама командасы уламдан-улам чабуулдарын курчутуп, эсепти өзгөртүүгө жакындап жатышат. Азырынча Кытай курама командасынын оюнчуларынын соккулары таамай болбой жатат.

18:28. Матяш дагы бир ката кетирип, Кытайга жардам берип коё жаздады.

18:34. Гол! Кытай курама командасы эсепти 1:2 кылып кетти. Ю Дабао Матяшты алдап өтүп, таамай сокку узатууга үлгүрдү.

18:36. Кайрат Жыргалбек уулу чабуулда топту жоготуп, кытайлыктар контр-чабуулга чыгышты.

18:37. Бул беттешти көрүү үчүн стадионго 1700дөн ашуун күйөрман келгенин АФКнын өкүлдөрү маалымдады.

18:40. Кытай курама командасынын оюнчулары убакытты чоюуда. Кытайдын оюнчусу медициналык жардам сурап оюн талаасында жатат.

18:44. Кыргыз курама командасында алмаштыруу. Виталий Люксту Эрнест Батырканов алмаштырды. Бернхардтты Азиз Сыдыков алмаштырды.

18:45. Кытай курамасында дагы алмашуу орун алууда.

18:48. Беттештин негизги убактысы аяктап, калыс 5 мүнөт кошуп берди.

18:52. Акыркы мүнөттөрдө Кыргыз курама командасы эсеп санын өзгөртүүгө аракет кылган жок.

18:53. Калыстын ышкырыгы жаңырып беттеш аяктады. Кытай курама командасы 1:2 эсебинде жеңишке жетти.

18:54. Бул оюнда Павел Матяш катачылык кетирип, өз дарбазасына гол киргизип алды. Белгилүү болгондой, буга чейин 2017-жылы Матяш Мьянмага каршы беттеште жана 2018-жылы орун алган Японияга каршы беттеште ушул сыяктуу гол өткөргөн.