Дүйнөлүк банктын президенти мөөнөтүнөн мурда отставкага кетет

Дүйнөлүк банктын президенти Жим Йонг Ким мөөнөтүнөн мурда отставкага кетет. Бул тууралуу аталган мекеменин маалымат кызматына таянуу менен чет өлкөлүк басылмалар жазып чыгышты.

Маалыматка караганда, Ким ушул жылдын 1-февралынан тарта президенттик кызматын токтотот.

"Жетекчинин ордунда мекеменин аткаруучу директору Кристалина Георгиева убактылуу иштеп турат. Ким аталган кызматка 2012-жылы келген. 2016-жылы директорлор кеңеши аны президенттикке кайра шайлаган. Кимдин экинчи мөөнөтү 2022-жылы аяктамак", - деп жазышат басылмалар.

Ким аталган чечимди өз ыктыяры менен кабыл алганын айтып, мындан ары жеке бизнес менен алектенерин кошумчалаган. Ал АКШнын жараны.

Дүйнөлүк банк 1945-жылы түзүлгөн. Башкы кеңсеси АКШнын Вашингтон шаарында жайгашкан. Кыргыз өлкөсү аталган эл аралык уюм менен 1992-жылдан бери иштешип келет.