Кытай журналисти: "Дарбазачынын катачылыгы оюндун тагдырын чечип койду"

Дарбазачынын катачылыгы оюндун тагдырын чечип койду. Бул тууралуу кытай журналисти Юань Би Кыргыз-Кытай беттешинен кийин кыргыз журналисттерине билдирди.

Анын айтымында, кытай футболчулары бул оюнда чарчап тургандай көрүнгөнүн айтты.

"Менин оюмча, беттеш жогорку деңгээлде өткөн жок. Кытай курамасынын машыктыруучусу Марчелло Липпи беттешти 3 коргоочу, 4 жарым коргоочу жана 3 чабуулчу менен баштап, оюн учурунда футболчулардын бул жайгашуусун бир нече жолу алмаштырды. Кытай курама командасы мелдеш башталганга чейин машыгууларды өткөрүп, бул беттеште чарчап калды деген ойдо калтырды. Ошондой эле Кыргыз курамасы жакшы ойноду деп айтпайм, тескерисинче, Кытай курамасы жаман ойноду деп ойлойм.

Негизи беттештин тагдырын 2 эле учур чечип койду. Анын бири - Кыргыз дарбазачысынын катачылыгы. Бул учур Кытай курамасына түрткү берип, курама жеңишке умтула баштады. Ал эми экинчи учур - бул Марчелло Липпинин алмаштыруусу. Мен бул беттештин эсеби 1:1 болууга татыктуу болчу деп ойлойм", - деди кытай журналисти.

Белгилүү болгондой, 7-январда Бириккен Араб Эмираттарынын Аль-Айн шаарында Азия Кубогунун алкагында Кыргыз курама командасы Кытайга каршы беттеш өткөргөн. Беттештин 42-мүнөтүндө Ахлидин Исраилов эсеп санын ачып, 2-таймда дарбазачы Павел Матяш 2 жолу катачылык кетирип, Кыргыз курама командасы 1:2 эсебинде жеңилип калган.