ЭЛДИК ВИДЕО: Орусиядагы Кыргыз жараны өзү отурган жерге эки жолу түкүрүп, колундагы акчасын айып пулга деп көрсөттү

Социалдык тармакта Орусияда эмгектенген мекендешибиздин эки ирет түкүрүп, колундагы 10 миң рубль акчасын айып пулга берем деген видеосу талкууга алынды. Анда Кыргыз жараны иштеген жеринен кыска видео тартып, буларга токтолгон.

"Эгер биз түкүрүп мамлекетти карызынан куткара турган болсок, анда мен дагы өз салымымды кошом. Акча даяр, берем. Кыргыз өлкөсүнүн карызы жок болсун, элибиз тынч жашашы керек. Керек болсо дагы бир жолу түкүрөм. Айып пул 10 миң рубль болсун. Ак үйдүн алдына барып түкүргөн жердешиме кошумча болсун", - деген ал өз сөзүндө.

Түкүргөн адамга 5 500 сом айып пул салынат деген чечим коомдо кайчы пикирлерди жаратууда. Тагыраагы, айрымдары айып пулдун суммасы жогору десе, айрымдары бул мыйзам тазалыкты сактоо үчүн туура чечим экенин билдиришкен.

Маалым болгондой, Ак Үйдүн жанына түкүрүп, аны видео аркылуу жарыялап, бийликке кайрылуу жасаган жаран милиция бөлүмүндө сурак берген.

2019-жылдын 1-январынан тартып эреже бузуу жөнүндө кодекс ишке кирген. Анда коомдук жайларда түкүргөндөргө 5 500 сом айып пул салуу каралган.