Өкмөт башчы: "Түкүрүү бул терс көрүнүш, бирок айып пул салуу жагын карап чыгышыбыз керек"

Премьер-министр Мухаммедкалый Абылгазиев 2019-жылдын 1-январынан тарта күчүнө кирген жана соттук-укуктук реформалоо алкагында кабыл алынган жаңы кодекстерди жана мыйзамдарды ишке ашыруу маселеси боюнча кеңешме өткөрдү. Бул тууралуу өкмөттүн басма сөз кызматы билдирди.

Анда премьер-министр жол кыймылы эрежелерин бузгандыгы үчүн жазаны катаалдатуучу жаңычылдыктар коомчулукта ар-түрдүү реакцияны жаратканын белгиледи.

"Албетте, биз жарандарда коомдук аң-сезимдин жана коомдо жүрүм-турум тажрыйбасынын калыптанышына өзгөчө көңүл бурууга тийишпиз. Мунун баары биздин мамлекетибиздин тазалыгы үчүн. Башка мамлекеттен туристтер келсе жарандары маданияттуу экен, коомдук жайларда өздөрүн үлгүлүү алып жүрүшөт экен деген түшүнүк алып келишибиз керек. Жаш муундарыбызды үлгүлүү тарбиялоо - бул биздин милдетибиз. Бирок түкүрүүгө 5500 сом дегенди, менин оюмча, карап чыгышыбыз керек", - деди Мухаммедкалый Абылгазиев.

Өкмөт башчы жергиликтүү өз алдынча башкаруу органдарына калк арасында жаңы киргизүүлөрдүн маңызы тууралуу маалымдоо-түшүндүрүү иштерин жүргүзүүнү, ошол эле учурда айыптарды башкаруунун так механизмдерин иштеп чыгууну тапшырды.