Бири тамеки чегип, экинчиси түкүрүнүп. Интернетке жаңы тартипти бузган милиция кызматкерлеринин видеосу тарады

Милициянын үч кызматкери жол четиндеги дүкөндүн алдында туруп тамеки тартып жатканы тартылган видео интернетке тарады. Видеодон алардын бири улам-улам жерге түкүрүп жатканын жана анча алыс эмес жерде май куюучу жайы жайгашканын көрүүгө болот.

ИИМдин басма сөз кызматынын жетекчисинин орун басары Карима Аманкулова SUPER.KG'ге алардын аты-жөнү такталганын, териштирүүнүн жыйынтыгы менен тийиштүү чара көрүлө турганын кабарлады.

Маалым болгондой, видео 8-январь күнү Бишкектин четиндеги ГЭС-5 районунда тартылган.

1-январда "Эреже бузуу жөнүндө" кодекс күчүнө кирген. Ага ылайык, коомдук жайларда түкүргөн жеке жактарга 5 миң 500 сом, юридикалык жактарга 17 миң сом айып пул салынат. Ал эми тыюу салынган жайда тамеки тарткан жеке жактарга 1000 сом, юридикалык жактарга 5 миң сом айып салынат.