Милиция бөлүмүндө каза болгон Бурулайдын атасы: "Ала качкан баланын ошол күнү 34 миң сому жоголуптур"

Бүгүн, 10-январда Аламүдүн райондук сотунда Бурулай Турдали кызынын өлүмү боюнча милиция кызматкерлеринин жоопкерчилигин караган соттук отурум өтүп жатат.

Учурда Жайыл РИИБинин нөөмөт бөлүмүнүн ага нөөмөткер тергөөчүсү И.Иманалиев сурак берип жатат. Жабырлануучу тараптын жактоочусу "окуя болгон күндөгү видеокөзөмөлгө жазылган тасмалар эмнеге жоголуп кетти?" деген суроосуна ал билбей тургандыгын белгиледи.

"Ошол күндөгү тасмалар эмнеге жоголуп кеткендигин билбейм. Тасма сакталып калганда мен үчүн дагы жакшы болмок. Тасманын сакталышына жетекчилик жоопкерчилик алсын. Анткени видеокөзөмөл биз отурган жерге коюлганы менен, жазылган тасмалар жетекчиликтин иш бөлмөсүндө сакталат", - деди Иманалиев.

Ал эми Бурулайдын атасы Турдали Кожоналиев тасмалар атайын жок кылынган деген күмөнү бар экенин айтты. "Менин оюмча, тасмалар атайын жок кылынган. Ала качкан баланын 34 миң сому жоголуптур. Окуя 10-15 мүнөттө эмес, жок дегенде жарым саат ичинде болгон деп ойлойм. Мына ушундай жагдайларды жашыруу аракети болушу мүмкүн", - деди Кожоналиев.

Окуянын чоо-жайы:

Ушул жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган.

Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон. Бурулай Турдали кызы борбор шаардагы медициналык окуу жайлардын биринде окуй тургандыгын жана ушул жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.

Бул боюнча иш Бишкек шаарынын Свердлов райондук сотунда каралып, сот Марс Бөдөшовду 20 жылга, ала качууга айыпталган Акмат Сейитовду 7 жылга эркинен ажыраткан.