Кытайда 20 жыл мурда каза болгон кыздын сөөгү уурдалды

Кытайдын Хэбэй провинциясында мындан 20 жыл мурда каза болгон кыздын сөөгү уурдалды. Чет элдик басылмалар маркум 18 жашында каза болгонун жазып чыгышты.

Белгилүү болгондой, маркумдун сөөгүн мүрзөдөн казып алып, уурдап кетишкен. Кыздын туугандары анын сөөгүн каза болгон адамга турмушка берүү үчүн уурдап кеткенин айтышкан. Себеби 20 жыл мурун кыздын сөөгүн жерге берүүдө эч кандай баалуу буюмдар коюлган эмес. Ошондой эле бир канча ай мурун бейтааныш адамдар кыздын жансыз денесин сурап, ал үчүн акча сунуштаган. Бирок маркумдун ата-энеси бул сунуштан баш тарткан.

Айта кетсек, Кытайда өлүктөрдүн үйлөнүү тою деген ырым бар. Бул ырым маркумдар тиги дүйнөдө жалгыз болбой, түгөйү менен болсун деген максатта жасалат. Бирок маркумдарды үйлөнтүү алардын жакындарынын уруксаты менен болот. Көпчүлүк учурда үй-бүлө курууга үлгүрбөй көз жумгандардын жакындары каза болгон кыздардын сөөгүн сатып алышат. Айрым учурда каза болгон кыздардын баасы 10 миң долларга чейин жетет.

Учурда аталган окуя боюнча иликтөө иштери жүргүзүлүп жатат.