Дарбазачы Кутман Кадырбеков: "Мага бааны машыктыруучу жана күйөрмандарым коёт"

"Мен ойногонумду баалай албайм, мага бааны менин машыктыруучум жана күйөрмандарым коёт". Бул тууралуу Кыргыз-Корея беттешинен кийин Кыргыз улуттук курама командасынын дарбазачысы Кутман Кадырбеков айтты.

- Оюн тууралуу айта кетсең, кандай болду?

- Оюнга бардык күчүбүздү жумшадык. Өзүңөр билгендей, Түштүк Корея Европанын командалары менен тең деңгээлде ойноп келет. Биз колубуздан келген ишти аткардык. Бир стандарттык абалдан гол кирип кетти. Бул футбол, оюн жана биз анда өзүбүздүн күчүбүздү көрсөтө алдык.

- Биринчи оюнуңду канчага баалайсың?

- Мен ойногонумду баалай албайм, мага бааны машыктыруучу жана күйөрмандар гана коёт. Машыктыруучум мага берген тапшырмаларды толугу менен аткардым деп ойлойм. Беттеш катасыз болгон жок, бул менин улуттук курам үчүн биринчи оюнум. Колумдан келген бардык аракетти кылдым.

- Оюнда топ 3 жолу дарбазанын таякчасына тийип калды. Бул боюнча пикириң кандай?

- Кыргыздарда айтып коёт эмеспи, "Кудай берди" деп. Бул беттеште ошондой болду деп ойлойм. Кудайдан балдар жаракатсыз, жакшы ойнойлу деп тиленгем. Ошол эле учурда өзүң дагы салымыңды кошушуң керек экенин унутпашың керек.

- Негизги курамда чыга турганыңды билгенде кандай сезимдер болду?

- Абдан кубандым. Мындай мүмкүнчүлүк дайым боло бербейт. Футболчулар оюнга чыга турганын алдын ала биле албайт. Ошондуктан ар дайым даяр болуп туруш керек.