Ысык-Көлдө мүрзөдөгү эстеликтерди талкалап кеткендер изделүүдө

Ысык-Көл районундагы Ананьево айылындагы православдардын мүрзөсүн талкалап кеткендерди издөө иштери жүрүүдө. Бул тууралуу бүгүн, 12-январда SUPER.KG порталына облустук милициядан билдиришти.

Маалым болгондой, кечээ айылдын тургундары белгисиз адамдар мүрзөнүн тосмолорун, көрүстөндөгү эстеликтерди, белгилерди сындырып, гүлдөрдү туш тарапка чачып кетишкенин билдиришкен. Бүгүн айыл тургундары мүрзөнүн жанына топтолушуп, чогулуш өткөрүштү. Алар мындай жагымсыз жорукту кылгандарды жазасыз калбашы керектигин айтышууда.

"Бул факт боюнча окуя болгон жерде кароо жүргүзүлгөн. Жалпы санынан 35 жыгач эстелик жана 2 мрамор эстелик талкаланганы аныкталды. Учурда бул факт боюнча иликтөө жүрүп, кылмышка шектүүлөрдү аныктоо иш-аракеттери улантылууда", - деп билдиришти милициядан.

Жергиликтүү тургундар болжол менен 89 көрүстөндөгү эстелик, тосмо, гүлдөрдү талкалоо аракеттери болгонун айтышууда.