Окумуштуулар калкы туура эмес тамактанган өлкөлөрдүн тизмесин түздү. Кыргыз өлкөсү 3-орунда

Германиянын Йена шаарындагы Фридрих Шиллер университетинин окумуштуулары Европа жана Азия өлкөлөрү арасында туура эмес тамактангандарга карата изилдөө жүргүзүшкөн. Бул тууралуу бир катар чет элдик жана жергиликтүү маалымат булактары жазды.

Изилдөөгө ылайык, туура эмес тамактануу ашыкча семирүүгө, жүрөк-кан тамыр ооруларына жана кан басымдын жогорулашына алып келет. Бул көрүнүштөр кээде адам өлүмү менен аяктаары каралган. Анда жазылгандай, туура эмес тамактануу - күнүмдүк рациондо туздуу тамактардын көп, ал эми жашылча-жемиштердин жок болушу. 2016-жылы туура эмес тамактануудан улам келип чыккан оорулардан Европада 2 миллион 100 миң адам көз жумган.

Өзбекстандын калкы туура эмес тамактануу боюнча 1-орунда турат. Анда 100 миң адамдын ичинен 394ү ушул көйгөйдөн улам көз жумат. Ал эми антирейтингдин 2-орунуна Түркмөнстан чыгып, 100 миң кишиден 376 адам туура эмес тамактануудан каза болору аныкталган. Кыргыз өлкөсү 3-катарда жайгашкан. Анда 100 миң кишинин ичинен 350 адам тамактануу эрежелерин сактабагандыктан каза болору белгиленген.

Ушундай эле көйгөй бар он өлкөнүн катарында Украина, Молдова, Азербайжан, Беларусь, Тажикстан, Казакстан жана Орусия турат. Батыш Европада тамактануу эрежелерин көп бузган өлкө деп Германия табылган. Испания, Израиль жана Франциянын калкы өз саламаттыгына туура тамактануу аркылуу кам көргөнү айтылат изилдөөдө.