Чүйдө 15 жашар кыз көз жарды. Баланын атасы башка өлкөгө кетип калган

Ысык-Ата райондук ооруканасынын дарыгери маалымдаган 15 жаштагы кыздын көз жарышы боюнча маалыматты Чүй ОИИБинин басма сөз кызматы тастыктап, окуя боюнча маалымат берди. Ага караганда, жашы жете элек кыз 11-январь күнү көз жарган. Маалыматта белгилүү болгондой, 2003-жылы туулган кыз Канттагы төрөтканада эркек төрөп, үйүнө чыгарылган.

"Ысык-Ата РИИБинин жашы жете электер менен иштөө инспекциясы тарабынан жогорудагы маалымат иликтенди. Анда жашы жете элек кыз менен жыныстык катнашта болуу фактысы аныкталган. 2003-жылы туулган кыз аймактык оорукананын төрөт бөлүмүндө көз жарган. Ал Ысык-Ата районунун тургуну болот. Аталган факт боюнча жаш эненин апасы жана анын катышуусунда кыз өзү да суракка алынган. Анда маалым болгондой, 16 жашка толо элек кыз Ф. аттуу жаран менен таанышып, 2018-жылдын апрель айынан тарта белгисиз бир мөөнөт ичинде бирге жашап, жыныстык байланышта болуп жүрүшкөн. Мындан соң Ф. башка өлкөгө иштеп келгени кеткен. Ал кеткенден кийин кыздын кош бойлуу экени билинген.

Аталган факт кылмыштар боюнча бирдиктүү реестрге каттоого алынып, Кылмыш-жаза кодексинин 164-беренеси (16 жашка чыга элек, жашы жете элек адам менен жыныстык катнашка баруу) боюнча кылмыш иши козголду", - деп билдирет Чүй ОИИБинин басма сөз кызматы.

Аталган факт боюнча экспертизалар дайындалып, тергөө иштери жүрүүдө.