Жогорку Сот өзүн-өзү өрттөйм деген Маманованын ишин кайра кароо үчүн шаардык сотко жиберди

Жогорку Сот өзүн-өзү өрттөйм деген Кызыл-Кыя шаарынын тургуну Роза Маманованын арызын кайра карап чыгуу үчүн Кызыл-Кыя шаардык сотуна жиберди. Жогорку Соттун соттук жамааты мындай чечимди 15-январда кабыл алган.

Мамановага Кызыл-Кыя шаардык ички иштер бөлүмү тарабынан 2017-жылдын 4-октябрында алдамчылык беренеси боюнча кылмыш иши козголуп, шаардык соттун чечими менен бир жылга шарттуу кесилген. Кийин Маманова облустук сотко кайрылып, облустук сот шаардык соттун чечимин күчүндө калтырып койгон. Мындан улам Маманова Жогорку Сотко акыйкат чечим чыгарып берүү өтүнүчү менен кайрылган.

Төрт баланын энеси Маманова буга чейин Бишкекке келип өзүн-өзү өрттөй турганын, ага Кызыл-Кыя шаардык милиция бөлүмүнүн кызматкерлеринин мыйзамсыз иш-аракеттери түрткү болуп жатканын SUPER.KG'ге айткан.