Филиппин дарбазасына 3 гол киргизип, күндүн каарманына айланган Виталий Люкс (өмүр баяны)

Футбол боюнча Кыргыз курама командасы Азия Кубогунун плей-офф баскычына өтүүгө чоң мүмкүнчүлүк алды. Бириккен Араб Эмираттарынын Дубай шаарында болуп өткөн "С" тайпасынын Кыргыз өлкөсү менен Филиппин курамаларынын оюнунда "Ак шумкарлар" жеңишке жетишти. Кыргыз өлкөсү 3:1 эсебинде филиппиндик футболчуларды жеңип алып, 3 упайга ээ болду. Голдордун баарын чабуулчу Виталий Люкс киргизип, хет-трик жаратты жана беттештин жылдызына айланды десек болот. Сиздерге 2 оюндан бери ишенимди толук актай албай, бирок чечүүчү оюнда бир нече голдун автору боло алган чабуулчу жөнүндө маалыматты сунуштайбыз.

Маалыматтарга караганда, Виталий Люкс 1989-жылы 27-февралда Чүй облусунун Кара-Балта шаарында туулган. Кыргыз Республикасынын жана Германиянын жараны.

Кыргыз өлкөсүнүн футбол боюнча улуттук курама командасынын жана Германиянын "Ульм 1846" клубунун чабуулчусу. Люкс 6 жашында үй-бүлөсү менен Кыргыз мамлекетинен Германияга көчүп кеткен. 2015-жылдан бери Кыргыз улуттук курама командасында ойноп келет. Алгачкы оюнун Бангладеш курамасына каршы өткөргөн.

Виталий Люкс Германиянын "Нюрнберг-2" клубунан 2016-жылы ошол эле мамлекеттин "Унтерхахинг" клубуна өткөн. Аталган клуб менен 2017-жылдын 30-июнуна чейин келишим түзүлгөн. Ал эми 2018-жылы Германиянын "Ульм 1846" клубуна которулган. Бул клуб менен түзүлгөн келишим 2020-жылга чейин күчүндө болот.

Люкс буга чейинки маектеринде Кыргыз курамасында ойноп жаткандыгы боюнча пикирин билдирип, "мен туулган өлкөм үчүн ойноп жатканыма сыймыктанам. Биз командабыз менен чоң үй-бүлөбүз", - деген.