Азамат Байматов: "Ильзат Ахметовдун туура эмес чечим кабыл алып алганы үчүн өкүнүп калышын каалабайм"

Футбол боюнча Кыргыз курама командасынын капитаны Азамат Байматов SUPER.KG порталына Кыргыз жеринде туулган москвалык ЦСКА клубунун оюнчусу Ильзат Ахметов тууралуу пикирин билдирди.

Анын айтымында, Ахметов кыргыз курамасы үчүн ойноп, өсүп келе жаткан муун үчүн үлгү болушу керек.

"Ар бир футболчуда маанилүү оюндан кийин же позитивдүү, же негитивдүү эмоция пайда болот. Кечээги оюндан кийин баарыбызды жалаң гана жакшы эмоциялар каптап турду. Дал ошол эмоциялардын толкунунда социалдык тармак аркылуу Ильзат тууралуу пикиримди билдирүүнү чечип, кайрылуу жасадым.

Машыктыруучулар штабы, Футбол федерациясынын жетекчилери Ахметов менен байланышууга аракет кылып, майнап чыккан жок. Мен аны абдан жакшы түшүнүп турам. Улуу муун катары анын туура чечим кабыл алуусуна түрткү болуп, кеп-кеңештерибизди айтуу биздин милдетибиз деп билем. Бирок ал кандай чечим кабыл алса биз туура кабыл алышыбыз керек.

Кыргыз жеринде туулган адам улутунан көз карандысыз өз өлкөсүнүн керегине жараша керек деп ойлойм. Улуттук кураманы карап көргүлө, командада эч кандай улутчулдук жок. Бизде бир нече улуттардын өкүлдөрү ойнойт. Ошондуктан Ильзат өз өлкөсүн тандап, мекенинин патриоту экендигин көргөзүү менен башкаларга, жаңы өсүп келе жаткан муунга үлгү болушу керек.

Ахметов үчүн тандоо мезгили келди. Эгерде Орусия курамасынын катарында бир эле оюн өткөрсө кыргыз курама командасында ойной албай калат. Ошондуктан эки өлкөнүн бирин тандашы керек. Ал азыр жаш, болгону 21 жашта. Бирок бир топ убакыт өткөндөн кийин туура эмес чечим кабыл алганы үчүн Ильзаттын өкүнүп калышын каалабайм", - деди Байматов.

Белгилей кетсек, Азамат Байматов Азия кубогундагы Кыргыз-Филиппин беттешинен кийин социалдык тармактагы баракчасы аркылуу Ильзат Ахметовго кайрылуу жасап, анын улуттук курамага ойноого чакырган.