Бишкекте күч менен таратылган митингден сүрөттөр

Бүгүн, 17-январда Бишкекте мыйзамсыз миграция маселесине байланышкан митинг өттү. Митингдин башталышында 200гө жетпеген киши чогулса, 5 саат аралыгында алардын саны миңге чукулдады.

Алар алгач бийликке жана Жогорку Кеңешке этникалык кыргыздардан башка чет элдиктерге Кыргыз жарандыгын берүүгө мораторий киргизүү, Кыргыз жеринде мыйзамсыз иштеп жүргөн Кытай жарандарын өлкөдөн чыгаруу талабын коюп башташкан. Бирок чогулгандар сүйлөгөндөн кийин талаптардын тизмеси кеңейтилди. Андан кийин коюлган талаптар боюнча 5 адамдан турган топ Жогорку Кеңешке кирип, вице-спикер Мирлан Бакиров менен жолугушуп чыгышты.

Тилекке каршы, Жогорку Кеңешке кирип чыккандардын алып чыккан жообуна анда тургандар канааттанбай, "Ак Үйгө барабыз" деп чуу чыгарышты. Коомдук коопсуздукту камсыз кылып турган милиция кызматкерлери алардын айрымдарын кармап, калгандарын таратып жиберди.

Кармалгандардын саны 21ге жетип, алар Биринчи Май райондук милиция бөлүмүндө 4 саатка чукул убакыт болушту. Ар бири түшүнүк кат жазып, толтурулган токтомдун негизинде 3 миң сомдон айып төлөөгө милдеттендирилди.