Кытай жарандарынын Кыргыз өлкөсүнө мыйзамсыз кирүүсүнө каршы митингдин уюштуруучусу 3000 сом төлөөгө милдеттендирилип, милиция бөлүмүнөн чыгарылды

Кечээ, 17-январда Бишкектеги борбордук "Ала-Тоо" аянтында Кытай жарандарынын өлкөгө мыйзамсыз кирүүсүнө каршы митинг өткөн. Ал саат 11:00дө башталып, кечки саат 16:30га чейин уланган. Митингде унаалар өтүүчү жолго чыгып кеткен элди акциянын аягында милиция кармай баштаган. Кармалгандар Бишкек шаардык Биринчи Май РИИБине алып келинген.

Кармалгандардын арасында митингди баштап жүргөн уюштуруучу Аманбол Бабакулов да болгон. Аны митингди уюштуруунун убактысы созулуп кеткени үчүн кармаган. Бабакулов SUPER TV'га берген маегинде буларга токтолду.

"Митингди саат 13:00гө чейин гана уюштурууга уруксат алгам. Андан кийин ошончо элди башкаруу мүмкүн болбой калды. Арасында чагымчылдар бар экен. Ошолор элдин багытын башкага буруп жиберишти. Биз бийлик өкүлдөрүнө кирип чыккандан кийин "буларды укпагыла, бийликтегилер буларды сатып алды" деп кыйкыра башташты. Андан кийин ар бир адам өзү үчүн жоопкерчилик тартышы керек да. Мен кеткиле, тарагыла, митингди жабык деп жарыялайм деп саат 1де эле айткам", - деди Бабакулов.

Аманбол Бабакулов башка кармалган адамдар сыяктуу эле 3000 сом өлчөмүндө айып пул төлөөгө милдеттендирилип, кечээ, 17-январь күнү кечинде милиция бөлүмүнөн коё берилген.