Азия Кубогу: БАЭ-Кыргыз беттеши боло турган стадионго 49 миң 500 көрүүчү батат (сүрөт)

Эртең, 21-январда футбол боюнча Кыргыз улуттук курама командасы Азия Кубогунун алкагында Бириккен Араб Эмираттары менен беттешет. Оюн Эмираттын Абу-Даби шаарындагы "Зайед спорт сити" стадионунда өтөт.

Аталган стадион 1979-жылы салынып Бириккен Араб Эмираттарынын биринчи президенти шейх Зайед ибн Султандын атынан коюлган. Бул стадиондо өткөн ири мелдештердин бири 2003-жылдагы жаштар арасындагы Дүйнө чемпиондугу болгон. Анда "Зайед спорт сити" стадионунда мелдештин ачылыш жана жабылыш аземдери өткөн. Ошондой эле клубдар арасындагы Дүйнө чемпиондугунун беттештери өтүп турат. Стадион 49 миң 500 көрүүчүнү батырат.

БАЭ-Кыргыз беттеши 21-январда орун алып, Бишкек убактысы боюнча саат 23:00дө башталат.

Кыргыз футболчулары тайпалык баскычта Кытай курама командасына 1:2 эсебинде жана Түштүк Кореяга 0:1 эсебинде жеңилип калган. 3-турда Кыргыз курамасы Филиппин курама командасына каршы чыгып, 3:1 эсебинде утуп алган.