Оюндан от чыгат. Орусияда квест оюнуна барган кыздын көзү көрбөй калды

Орусияда 17 жаштагы кыз квест оюнуна катышып, көзү көрбөй калды. Чет элдик басылмалардын маалыматына ылайык, окуя Ярослав облусундагы Рыбинск шаарында болгон.

Белгилүү болгондой, кырсыкка кабылган кыз ыктыярчы болуп иштеген. Мындан улам ыктыярчы топтогулар чогулуп, квест оюнун ойноого барышкан. Оюндун жүрүшүндө катышуучулар бөлмөдөн чыгуунун жолун издеп, терезенин кармагычы бар экенин байкап калган. Бөлмөдө камалып калган оюнчулар терезе аркылуу чыгышкан. Ал эми эң акыркы болуп 17 жаштагы кыз чыгып бара жатканда фейерверк атылып, бетине тийген. Фейерверк терезенин кармагычында катылган.

Окуя болгондон кийин кызга 4 саатка созулган операция жасалган. Бирок кыздын көзүнүн көрүүсүн калыбына келтирүү мүмкүн болгон эмес. Учурда бул окуя боюнча тергөө иштери болуп жатат.