Бишкекте зордуктоо кылмышына шектелген жаран кармалды

Бишкектин Свердлов РИИБинин кызматкерлери 20-июнда 29 жаштагы Умидбек П. аттуу Ош облусунун тургунун кармашты. Бишкек ШИИБинин билдиришинче, бул жаран өлкө аймактарынан борборго жумуш издеп келген кыздарга өзүн жумуш берүүчү катары тааныштырып, кыздарды Карагач токоюна алып барып, сабап, зордуктап жана тоноп жүргөн. Буга чейин 23 жаштагы Ысык-Көл облусунун тургуну К.Ж. милицияга кайрылып, бейтааныш бирөө "Дордой" базарындагы эжесинин контейнерине сатуучулук жумушка 15 000 сом айлык төлөп иштетерин айтып, аны Карагач токоюна алып барып, ур-токмокко алып, тоноп андан соң зордуктаганын билдирген. Аталган факты боюнча Свердлов РИИБи тарабынан “зордуктоо” жана “тоноо” беренелери боюнча кылмыш иши козголуп, бул сыяктуу дагы бир арыздын негизинде иликтөө жүргүзүлгөн. Натыйжада 29 жаштагы аталган жаран кармалып, жасаган кылмыштарын моюнга алган. Свердлов РИИБи мындай кылмыштан жабыр тарткандарга 0555 04 29 13, 0552 10 29 17, (0312) 43 28 15 телефон номерлерине же “102ге” чалууну эскертет.