Депутат Гаипкулов: "Алимент төлөөдөн качкан аталардын, сот аткаруучулардын эшигин сагалаган энелердин саны көбөйдү"

Бүгүн, 24-январда Жогорку Кеңештин жалпы жыйыны өтүп жатат. Анда "Сот аткаруучулардын статусу жөнүндө жана аткаруу өндүрүшү тууралуу" Кыргыз Республикасынын Мыйзамына өзгөртүүлөрдү киргизүү жөнүндө" мыйзам долбоору каралууда.

Талкууда депутат Искандер Гаипкулов акыркы учурда ажырашкан үй-бүлөлөр көбөйүп жатканын айтты.

"Алимент төлөөдөн качкан аталардын саны көбөйүп жатат. Сот аткаруучулардын эшигин сагалаган энелер көбөйдү. Балдары үчүн алимент төлөбөй качып жүргөндөргө кандай чара көрүп жатасыңар?" - деди эл өкүлү.

Сот департаментинин директору Рустам Ибраимовдун айтымында, учурда статистикалык маалымат боюнча алимент төлөөдөн качкан 2731 адамга издөө жарыяланган.

Кыргыз мамлекети боюнча жалпы 41 миң 843 эне баланын атасынан алимент төлөтүп алуу үчүн расмий түрдө кайрылган.