"Ак шумкарлар" күйөрмандарына сахнадан өз кол тамгалары коюлган топторду тебишти (фоторепортаж)

Бүгүн, 24-январда Бишкек шаарындагы "Ала-Тоо" аянтында Кыргыз курамасынын футболчулары менен калың эл жолугушту. Жолугушуу концерттик программа менен коштолуп, көптөн күткөн "Ак шумкарлар" аянтта орнотулган сахнага келишти. Ар бир футболчу эл алдына чыгып, күйөрмандардын колдоосу үчүн ыраазычылыктарын айтышты. Ошондой эле Кыргыз Республикасынын Футбол федерациясынын музейи ачылып, өлкөнүн футболунун тарыхы жазылып жатканы тууралуу сөздөр сүйлөндү.

Футболчулардын ар бири сахнадан өз кол тамгалары коюлган топторду күйөрмандарды көздөй тебишти. Туш болгон күйөрмандар топторду тосуп алышты.

Футбол боюнча Кыргыз улуттук курама командасы 21-январда Азия Кубогунун жарым чейрек финалынын алкагында БАЭ курамасы менен беттешип, жеңилүү ызасын тартып калган. Абу-Даби шаарында орун алган беттеш 2:3 эсеби менен аяктап, кыргыз футболчулары мелдештен четтетилип калышкан.

Бүгүн, 24-январда таңкы саат 4:30да Азия Кубогуна катышкан футбол боюнча улуттук курама команда өлкөгө кайтып келди. Дубай-Бишкек каттамындагы учак менен Кыргыз курамасынын 20 оюнчусу, машыктыруучулар штабы жанан Футбол федерациясынын өкүлдөрү келишкен.