7-апрель окуясы боюнча өтүп жаткан соттук отурумда жабырлануучулар менен айыпталуучулардын ортосунда дагы уруш чыкты

Бүгүн, 22-июлда 7-апрель окуясы боюнча өтүп жаткан соттук отурумда жабырлануучулар менен айыпталуучулардын ортосунда дагы уруш чыкты. Уруш жактоочу Осунбек Жамансариев “Альфа” атайын даярдыктагы аскерлер бөлүгүнүн кызматкери Сергей Цигельниковдун баш коргоо чарасын өзгөртүп, камакка алуу сунушун киргизгенде башталды. Айыпталуучу Цигельников: “Жамансариевден айырмаланып, мен 15 жыл этиканы окугам. Менин аскердик намысым маймыл болууга жол бербейт. Эгерде менин туугандарыма коркунуч туулуп жатса, мен аларды коргоого даярмын”,- дегенде, соттук отурумга катышып жаткан жабырлануучу тараптын туугандары айыпталуучуларга жана сотко карата жаман сөздөрдү айтышты. Эске сала кетсек, 17-июлда 7-апрель окуясы боюнча өтүп жаткан сот процессинде жабырлануучулар менен сот процессиндеги коопсуздукту камсыз кылып жаткан милиция кызматкерлеринин ортосунда мушташ чыккан. Айыпталуучуларды залга алып келишкенде аларды жабырлануучулар алдын-ала даярдап келишкен таштар менен урушуп, андан соң дубалда илинип турган картиналарды жулуп алып ыргытышкан.