КСДП: "Мээрбек Мискенбаев сурак берүүгө кеткен бойдон дайынсыз. Жактоочусунун да телефону өчүк болууда"

Бүгүн, 25-январда Экономикалык кылмыштарга каршы күрөшүү боюнча мамлекеттик кызматы тарабынан суракка чакырылган Жогорку Кеңештин экс-депутаты Мээрбек Мискенбаев эртең менен кеткен бойдон байланышка чыга элек экенин SUPER.KG порталына КСДПнын өкүлү Кундуз Жолдубаева билдирди.

"Ал эртең менен саат 10:00дө суракка кеткен бойдон бүгүн кечке байланышка чыккан жок. Азыркыга чейин анын телефондору өчүк болууда. Негизи бүгүн Мээрбек менен анын жактоочусу да бармак, бирок ал бошобой калып жалгыз кеткен болчу. Бүгүн жактоочу тергөөчү менен байланышып, эмне болуп жаткандыгын бизге кабарлап жаткан. Мындан 2 жарым саат мурун аны менен акыркы жолу сүйлөшкөнүмдө ал Мээрбек беттештирүүдөн кийин коё берилерин билдирген. Учурда жактоочунун да телефону өчүк болууда. Ошол себептен азыр бизде эч кандай маалымат жок. Жубайы менен да байланышып жатабыз, Мээрбек ага да байланышка чыкпаптыр. Ал да азыр телефон чалуу күтүп отурат", - дейт Жолдубаева.

Айта кетсек, бүгүн “Айкөл Ала-Тоо” коомдук бирикмесинин төрагасы Мээрбек Мискенбаев жана анын орун басары Амантур Жамгырчиев Экономикалык кылмыштарга каршы күрөшүү боюнча мамлекеттик кызматы тарабынан кармалганы айтылган. Ошондой эле Мискенбаевдин жубайы ал бир нече күндөн бери сурак берүүгө барып жатканын айткан.

Окуянын чоо-жайына кайрылсак:

Былтыр июнь айында "Айкөл Ала-Тоо" жана "Апрель баатырлары" коомдук бирикмелеринин жетекчилерине карата Кылмыш-жаза кодексинин "алдамчылык" беренеси боюнча кылмыш иши козголду деген маалымат чыккан. Буга чейин былтыр март айында Мээрбек Мискенбаев "президенттин иниси Асылбек Жээнбеков өзү убадалагандай парламенттеги депутаттык мандатын тапшырып, биздин катарга кошулсун" деген талапты койгон.