Осунбек Жамансариев, 7-апрель окуясынын жабырлануучуларынын жактоочусу: "17-июлда сот залында чыккан жаңжалдан келтирилген чыгымды төлөп берүүгө даярбыз"

“7-апрель окуясы боюнча 17-июлда өткөн соттук отурумдагы жаңжалдан улам келтирилген чыгымдарды төлөп берүүгө даярбыз”,- деди бүгүн, 22-июлда “Мекен шейиттери” уюмунун төрагасы, аталган окуяда жабырлануучулардын жактоочусу Осунбек Жамансариев. Айтымында, 17-июлда соттук отурумда чыккан мушташтан улам келтирилген чыгым 60 миң сомду түздү. “19-июлдан баштап жабырлануучу тарап аталган сумманы чогултууну баштады. Жабырлануучу тараптын күнөөсү бар экенин моюнга алып, ушул аптанын аягына чейин чыгымды толугу менен төлөп берүүгө даярбыз”,- деди ал. Ошондой эле ал мушташ чыккан күнү жаракат алган аскерлерден кечирим сураганын билдирди. Эскерте кетсек, 17-июлдагы сот процессинде жабырлануучулар менен сот процессиндеги коопсуздукту камсыз кылып жаткан милиция кызматкерлеринин ортосунда мушташ чыккан. Айыпталуучуларды залга алып келишкенде аларды жабырлануучулар алдын ала даярдап келишкен таштар менен урушуп, андан соң дубалда илинип турган картиналарды жулуп алып ыргытышкан.