Орусиялык атактуу мушкер Фёдор Емельяненко Райан Бейдерден нокаутка учурады

Кечээ, 27-январга караган түнү орусиялык мушкер Фёдор Емельяненко оор салмак боюнча Bellator беттешинин финалында америкалык мушкер Райан Бейдерге утулуп калды. Бул тууралуу чет элдик басылмалар жазып чыгышты.

Маалыматка ылайык, баары күткөндөй беттеш узакка созулган жок. 42 жаштагы мушкер Фёдор Емельяненко беттештин алгачкы мүнөттөрүндө эле нокаутка учурады. Алгач ал тең салмакты жоготуп, биринчи узатылган соккуну өткөрүп жиберген. Кайра экинчи узатылган сокку беттештин жеңүүчүсүн аныктаган сокку болду. Беттештин жыйынтыгы Фёдор Емельяненконун карьерасын жыйынтыкталышынан кабар берет деген маалыматтар айтылууда.

Буга чейин Фёдор Емельяненко апрель айында Bellator мелдешинин чейрек финалында Фрэнк Мирди алгачкы раундда жеңип алган. Ал эми жарым финалда америкалык Чейл Соннен менен болгон беттеште ага 1 раунд гана жетиштүү болгон эле.

Бул беттеш орусиялык мушкердин карьерасындагы 45-беттеши. Жогорудагы жеңилүүдөн мурун ал 38 беттешин жеңиш менен, анын ичинен 14 беттешти нокаут менен жеңген. 5 жеңилүүсү жана 1 өткөрүлбөй калган беттеши бар болчу.