Мурдагы министр Аргынбек Малабаев жол кырсыгына кабылды

Мурдагы транспорт жана коммуникация министри Аргынбек Малабаев жол кырсыгына кабылды. Бул тууралуу SUPER.KG порталына Чүй облустук Жол кыймылынын коопсуздугун камсыздоо башкармалыгынын басма сөз кызматы тастыктады.

Маалыматка ылайык, 27-январь күнү саат 18:00 чамасында Сокулук районундагы Белогорка капчыгайында Toyota Land Cruser үлгүсүндөгү унаа 10 метрдей бийиктиктен кулап кеткен. Кырсыктын кесепетинен айдоочу окуя болгон жерден каза болуп, 3 жүргүнчү Сокулук райондук ооруканасына жеткирилген.

"Ооруканага жеткирилгендердин бири мурдагы министр Аргынбек Малабаев экендиги белгилүү болду. Учурда ал жана дагы бир жүргүнчү оор абалда жандандыруу бөлүмүндө жатат", - деди басма сөз катчы.

Айрым маалыматтар боюнча кырсыкка кабылгандар аңчылыкка бара жаткандыгы айтылууда.