Финансы министри Жээнбаева: "2018-жылдын жыйынтыгында Кыргыз өлкөсүнүн мамлекеттик карызы 4,4 миллиард долларды түздү"

2018-жылдын жыйынтыгында Кыргыз өлкөсүнүн мамлекеттик карызы 4,4 миллиард долларды түздү, анын 85,7 пайызы тышкы карыз, 14,3 пайызы ички карыз болуп саналат. Бул тууралуу бүгүн, 28-январда Жогорку Кеңештин Бюджет жана финансы боюнча комитетинин жыйынында финансы министри Бактыгүл Жээнбаева билдирди.

Ал жыл ичинде мамлекеттик карыздарды төлөөгө 23,7 миллиард сом жумшалганын айтты.

"Мамлекеттик карыздарды төлөөгө жумшалган каражаттын 7,1 миллиард сому алынган насыялардын үстөк пайызын жабууга, ал эми 16,7 миллиард сому негизги карыздарды жабууга чегерилген. Өткөн жылы мамлекеттик инвестициялар программасы боюнча түшкөн каражат 19,6 пайызды түзүп, план 75,8 пайызга гана аткарылды. Анын ичинде гранттар – 5,7 миллиард сом, насыялар – 9,2 миллиард сом", - деп кошумчалады финансы министри.

Жыйында "Кыргыз Республикасынын Бюджеттик кодексине өзгөртүүлөрдү киргизүү жөнүндө" мыйзам долбоору каралды.