Тоолорду эңсейсизби? Анда өзүңүз жетпесеңиз да, көзүңүз жетсин. Кегети капчыгайына болгон саякат (фоторепортаж)

20 метр шаркыратма, асман тиреген карагай-чер, кымгуут шаардан алыстаткан таза аба, кар баскан тоолор... Кыргыз жеринин сулуулугуна суктанып бүтүү мүмкүн эмес экендигин дагы бир ирет далилдеген төмөндөгү фоторепортаж сиз үчүн.

Кегети капчыгайы.

Чүй облусундагы эң кооз жерлердин бири болгон Кегети капчыгайы Бишкек шаарынан 90 чакырымдай алыстыкта, унаа менен барсаңыз орто эсеп менен бир жарым саат убакытты талап кылат. Кыргыз Ала-Тоосунун түндүк капталынан башталып, Чүй дарыясына жетпей сугатка бөлүнүп кетет. Узундугу 55 чакырым, алабынын аянты 290 чарчы чакырым. Жогору жагында токойлуу кууш өрөөн менен аккан өзөнүндө шагыл-таштар, босоголор бар.

Кегети шаркыратмасы.

Аталган капчыгайдын кире беришинде бийиктиги 18-20 метр болгон шаркыратма акиташтуу тик кашаттан кулап түшөт.

Тоону сүйгөн кыргыз, тоого тартылып жаткандай. Эс алгандардын басымдуу бөлүгү биздин жаштар, студенттер экени кубандырат. Алыс чакырымга сумка асынып, катар баскан саякатчылар көп.

Шаардын ичинен эч кайда чыкпай туруп Кыргыз өлкөсүн жактырбаган жарандар, бир ирет биздин Ала-Тоонун керемет жерлерин көрүп келдиңиз беле? Чет элдик туристтер көргөн сулуулукту сиз дагы көрө аласыз, мүмкүнчүлүк көбүрөөк. Ал үчүн эс алуу күндөрү интернеттен баш көтөрбөй үйдө жаткыча саякатка чыгууну жана чет өлкөгө ашыккандан биринчи өз өлкөңүздүн ушундай жерлерин көрүп келүүнү сунуштайбыз.