Сокулукта укук коргоо кызматкери унаасы менен 11 жаштагы окуучуну сүзүп, ал каза болду. Каза болгон бала эгиздин түгөйү болгон

Бүгүн, 29-январда жөө адамдар өтүүчү өтмөктө кетип бара жаткан 11 жаштагы окуучу баланы унаа сүзүп кетти. Мындай маалыматты SUPER.KG'ге Чүй облустук жол кыймылынын коопсуздугун камсыздоо башкармалыгынын басма сөз кызматы билдирди.

Маалыматка ылайык, жол кырсыгы таңкы саат 7:10дор чамасында Фрунзе менен Школьный көчөлөрүнүн кесилишинде болгон. Кырсыктан жаракат алган окуучу окуя болгон жерден каза болуп калган.

"Катуу ылдамдык менен бара жаткан 24 жаштагы айдоочу Ауди А6 үлгүсүндөгү унаасы менен 11 жаштагы окуучу баланы сүзүп кеткен. Маалым болгондой, сүзүп кеткен адам Чүй ОИИББинин күзөт-кайгуул кызматында ага сержант болуп иштегендиги аныкталды. Ал эми каза болгон окуучу Сокулук районуна караштуу Новопавловка айылындагы №1-Чыңгыз Айтматов атындагы лицейде билим алган жана эгиздердин түгөйү болгон", - деп билдирди басма сөз кызматы.

Окуя боюнча топтолгон маалыматтын баары Сокулук райондук тергөө кызматына өткөрүлүп, тергөө амалдары жүрүүдө.