Кыргыз күрөшүн өнүктүрүү үчүн чет мамлекеттерден машыктыруучулар чакырылат

Кыргыз күрөшүн өнүктүрүү үчүн өлкөгө чет элдик машыктыруучулар чакырылат. Бул тууралуу Жаштар иштери, дене тарбия жана спорт мамлекеттик агенттигинин басма сөз кызматы билдирди.

Маалыматка ылайык, кечээ, 28-январда Жаштар иштери, дене тарбия жана спорт боюнча мамлекеттик агенттиктин башчысы Канат Аманкулов балбандар Кенжебек Өмүралиев жана Данияр Көбөнов менен жолугушуу өткөргөн.

Жолугушуунун жүрүшүндө эркин күрөш жана грек-рим күрөшүн өнүктүрүү боюнча сүйлөшүүлөр болду. Андан сырткары жогорку квалификациялуу балбандарды даярдоо, кыргыз күрөшүн өнүктүрүү максатында чет элдик машыктыруучуларды чакыруу боюнча сөз болгон.

Белгилүү болгондой, Кенжебек Өмүралиев 1994-жылы Дүйнө чемпиондугунда эркин күрөш боюнча коло медалынын ээси болсо, Данияр Көбөнов Азия оюндарынын чемпиону, Дүйнө чемпиондугунун коло медалынын ээси.