Токмоктогу атышууда жаракат алгандардын дагы бири ооруканага жатты. Жактоочусу "ал өз көрсөтмөсүндө чырга Жогорку Кеңештин депутатынын катышы бар экенин айтты" дейт

Токмоктогу атышууда жаракат алган Аскат Усенов дагы ооруканага жаткырылды. Бул тууралуу SUPER.KG'ге 30-январда жактоочусу Алтын Бекмуратова кабарлады. Анын айтымында, Усенов 29-январда Чүй облустук милицияга барып көрсөтмө берген.

"Усенов милицияга барып өз көрсөтмөсүн берди. Ага мен дагы катыштым. Усенов көрсөтмөсүндө чырга Жогорку Кеңештин депутаты Урматбек Самаевдин катышы бар экенин айтып берди. Урматбек Самаев чырга катышкан Дастан Бейшенкуловдун тууганы болуп жатат. Бирок милиция кызматкерлери жарым сааттын аралыгында Токмок РИИБинен документ даярдай калып облустук милицияга алып келишти. Эми милиция күнөөнү Усеновго оодаруу аракетин көрүп жатат. Себеби аны уюшкан кылмыштуу топко мүчө деп санап жатышат. Кечээ камакка алуу керектигин айтышканда мен анын башы, буту жана далысы желим октон жаракат алганын айтып ооруканага жаткыруу өтүнүчүн келтиргем. Азыр Бишкектеги №4-ооруканада жатат. Аны милиция кызматкерлери кайтарууда", - деди Бекмуратова.

25-январь күнү Токмоктогу көзөмөл-өткөрүү жайына жакын жерде Дастан Бейшенкулов, Токмок шаардык кеңештин депутаты Кубан Кочкорбаев менен Бахтияр жана Аскат Усенов аттуу жарандардын ортосунда чыр чыккан. Милициянын маалыматына караганда, чыр товарларды жана күйүүчү майларды чек арадан мыйзамсыз өткөрүү учурунда акча маселесинен улам чыккан. Атышуудан Аскат жана Дастан аттуу эки адам жаракат алып, Дастан ооруканага жаткан.

Аталган окуяга Жогорку Кеңештин депутаты Урматбек Самаевдин дагы тиешеси бар экени айтылып, ал суракка алынган.