Депутат: "КТРКнын Байкоочу кеңешинин мүчөлүгүнө тигини шайлап кой" деген буйрук болбосун"

"КТРКнын Байкоочу кеңешинин мүчөлүгүнө тигини шайлап кой деген буйрук болбосун", - деп бүгүн, 30-январда Жогорку Кеңештин жыйынында депутат Жанар Акаев билдирди.

Анын айтымында, жогорку жактан көрсөтмө болду деп бир талапкердин аты аталууда. "Парламентке болгон мамилени өзгөрткүлө да. Премьер-министрди же каржы министрин шайлап жатсак бир жөн. Байкоочу кеңештин төрагасы эмес, мүчөсүн шайлаганга киришсек, анда парламенттин кадыр-баркын түшүрүп, сынга кабылабыз. Эң көп добуш алган адамды эмес, башка адамды шайлап койсок кандай болот?

КТРКнын Байкоочу кеңешинин мүчөлүгүнө тигини шайлап кой деген буйрук болбосун. Бирөө ошентип айтса трибунага чыгып айтабыз", - деди депутат.

Учурда Жогорку Кеңеште КТРКнын Байкоочу кеңешинин курамын бекитүү жөнүндө маселе каралууда.

Депутаттар түшкө чейин талапкерлерге жашыруун добуш беришип, эң көп добушту талапкер Чынар Капарова алды. Айрым эл өкүлдөрү жыйынга келбеген талапкерге добуш берилбей калганын айтышып, чечим жокко чыгарылды. Кайрадан добуш берүү маселеси каралып жатат.