Чынар Капарова: "Депутаттардан калыстыкты күткөм. Жогорку Кеңеш деген статусту бузуп, булгаганына өкүнөм"

"Жогорку Кеңештин депутаттарынан калыстыкты күткөм. Биздин депутаттарга өкүнүү менен карайм", - деди КТРКнын Байкоочу кеңешинин мүчөлүгүнө талапкер болгон Чынар Капарова.

Капарова анын түшкө чейинки шайлоодон эң көп добуш алганы чоң маселе жаратканын айтты. "Мен көп добуш алганда көп киши дем албай, регламентти бузганын коомчулук өзү көрүп турду. Биринчи добуш берилгенде өткөм, бирок ар кандай оюндар болуп кетти. Байкоочу кеңештин төрагасына, КТРКнын жетекчилигине жакпай турган кишини өткөрбөө оюну жүрүп кетти. Биздин депутаттарга өкүнүү менен карайм. Жогорку Кеңеш деген статусту бузуп, булгаганына өкүнөм.

Мен эртең менен келатканда социалдык түйүндөрдө Атыркүл Сарыбаева өтөт деген маалыматтар жазылган. Бирок мен депутаттардан калыстыкты күткөм. Көрсө бул жерде сүйлөшүү, кайсы бир адамдын кызыкчылыгындагы кишини шайлап коюу деген оюндары жүрүп жатканы белгилүү болуп калды", - дейт Капарова.

КТРКнын Байкоочу кеңешинин курамын бекитүү жөнүндө маселени карашкан депутаттар түшкө чейин талапкерлерге жашыруун добуш беришип, эң көп добушту талапкер Чынар Капарова алган. Айрым эл өкүлдөрү жыйынга келбеген талапкерге добуш берилбей калганын айтышып, чечим жокко чыгарылган. Кайрадан добуш берилип, экинчи добуш берүүнүн жыйынтыгында Атыркүл Сарыбаева КТРКнын Байкоочу кеңешинин курамына мүчө болуп шайланды.