Кыргыз футболчусу япониялык футболдук клуб менен келишим түздү

Футбол боюнча жаштар арасындагы Кыргыз курама командасынын оюнчусу Айдар Мамбеталиев карьерасын Японияда улантат. Бул тууралуу япониялык футболдук клуб социалдык тармактагы баракчасына жарыялады.

Маалыматка ылайык, "Абдыш-Ата" футболдук клубунун мурдагы коргоочусу "Ococias Kyoto" клубуна өттү. Аталган клуб Япониянын "Kansai Soccer League" деп аталган аймактык чемпиондукта ойнойт.

21 жаштагы Мамбеталиев жаңы клубдун расмий интернет баракчасына берген маегинде япон клубуна өткөнүнө кубанычта экенин белгилеген.

"Берилген мүмкүнчүлүк үчүн клуб жетекчилигине ыраазычылыгымды билдирем. Командага кошулганыма абдан кубанычтамын. Японияга алгачкы жолу келишим. Жаңы бийиктиктерге жетүү үчүн болгон күчүмдү жумшайм", - деп билдирген Мамбеталиев.

Айдар Мамбеталиев буга чейин "Абдыш-Ата" клубунда ойноп келген. Ошондой эле, өткөн футболдук сезонду Мальдив аралдарынын "Валенсия" клубунда жыйынтыктаган.