“Дарыгербиз” деп алдамчылык жол менен акча уурдап жүргөн аялдар кармалды

Бишкектин Свердлов РИИБинин кызматкерлери тарабынан көрүлгөн чаралардын негизинде, 28-июнь күнү өздөрүн “дарыгербиз” деп алдап, карыган эненин акчасын уурдап кеткен Чүй облусунун 29 жаштагы Л.Нелла жана Х.Екатерина аттуу тургундары кармалды. Бул тууралуу Бишкек ШИИБинин басма сөз кызматы бүгүн, 22-июлда билдирди. Аталган жарандар Бишкек шаарынын 82 жаштагы Г.М. аттуу тургунун “дарыгербиз” деп ишендирип үйүнө кирип, оорудан айыктырарын айтышып, 28 900 сомун уурдап, белгисиз тарапка издерин жашырган. Аталган факты боюнча Свердлов РИИБинин тергөө бөлүмү тарабынан Кылмыш-жаза кодексинин “алдамчылык” беренеси боюнча кылмыш иши козголду. Кылмышка шектүүлөр кармалгандан кийин ушул сыяктуу арыздар менен дагы эки жаран кайрылган. Бул сыяктуу окуяга кабылып, аталган аялдардан жабыр тарткандар болсо, Свердлов РИИБи 0555 04-29-13; 0552 10-29-17; 0558 02-03-06; 0312 43-28-15 (нөөмөт бөлүмү) телефон номурларына же "102" кызматына билдирип коюуну өтүнөт.