Ошто 2 кызын батирге он күндөн ашык кароосуз калтырган келин турмушка чыгып кеткен

Ош шаарында ижарага алып жашап жаткан батирине эки кичинекей кызын кароосуз калтырган келин турмушка чыгып кеткен. Андан сырткары анын жана кыздарынын эч кандай документтери жок экендигин бүгүн, 1-февралда Ош шаардык социалдык коргоо башкармалыгынын үй-бүлө жана балдарды коргоо бөлүмүнүн башчысы Гүлзина Раева SUPER.KG'ге билдирди.

"Балдар кароосуз калганы аныкталып, аларды алып кеткенге барганыбызда байланыш телефондорун калтырганбыз. Бүгүн эки кыздын 31 жаштагы А.Н. аттуу энеси байланышка чыгып, башкармалыкка келип кетти. Анын ишин комиссия карап чыгып, кыздарды кайтарып бербөө чечимин кабыл алды.

Комиссиянын чечимине ылайык, 2012-жылы туулган Мадина жана 2017-жылы туулган Мубина аттуу эки кыз 6 айлык убакытка Ош шаарындагы үй-бүлө балдарды реабилитациялык-адистештирилген борборунда, биздин карамагыбызда болот. Кыздар жашаган батирдин шарты өтө начар болчу, ичинде жагымсыз жыт бар. Андан сырткары кыздардын да, энесинин да эч кандай документтери жок экени аныкталды.

Кыздардын энеси паспорту күйүп кеткенин айтты, ал эми улуу кызын төрөт үйүнөн, кичүүсүн үйүнөн төрөгөнүн билдирди. Ошондой эле ал буга чейин күйөөсү менен ажырашып кеткенин кошумчалады. 10 күндөн ашык убакыт дайынсыз жүргөнүн турмушка чыкканы менен түшүндүрдү. Анын айтымына караганда, ал кыздарын карап жаткан батирдин ээсине акча салып турган.

Келе жаткан жумадан баштап төрөт үйүнөн улуу кызынын документтерин табууга аракет кылабыз. Эгер кыздардын энеси иштеп, кыздарын кайтарып алууга кызыкдар болсо биз ага көмөктөшүүгө даярбыз. Өзүнүн жана кыздарынын документтерин жасатууга жардам кылабыз. Эгер андай болбосо, аталган келин 6 айдан кийин энелик укугунан ажыратылат", - дейт Раева.

Айта кетсек, эки кичинекей кызы менен Ѳзгѳн кѳчѳсүндөгү үйлөрдүн биринин бир бөлмөсүн ижарага алган келин бир күндѳн кийин кыздарын үйгө таштап кетип 10 күн дайынсыз болгон. Бул убакыт аралыгында батирдин ээси балдарга тамак-ашын берип, аларды караган.