"Реал Мадрид" жана "Барселона" клубдары 1 айдын ичинде 3 жолу беттешет

1-февралда футбол боюнча Испания кубогунун жарым финалына өткөн командалар арасында чүчү кулак ташталды. Жыйынтыгында финалга чыгуу укугу үчүн "Барселона"-"Реал Мадрид" жана "Бетис"-"Валенсия" клубдары бири-бирине каршы ойномой болду.

"Бетис"-"Валенсия" беттешинин алгачкы оюну 5-февралда болсо, жооптук беттеш 28-февралда орун алат.

"Барселона" жана "Реал Мадрид" клубдары 6-февралда "Камп Ноу" стадионунда беттешип, 27-февралда жооптук оюн мадриддик клубдун "Сантьяго Бернабеу" стадионунда өтөт. Ал 3-март күнү аталган клубдар кайра эле Мадрид шаарында испан чемпиондугунун 26-турунун алкагында кез келишет. Буга байланыштуу футбол күйөрмандары 6-февралдан 3-мартка чейинки аралыкта 3 ирет "Эль-Класико" беттешин көрүүгө мүмкүнчүлүк алышты.

Буга чейин испан кубогунун тарыхында 19 жолу "Эль-Класико" орун алган. 10 жолу "Реал Мадрид" жеңүүчү аталса, 9 жолу каталондук клуб жеңишке жетишкен.