Москвада метродо рельске кулап түшүп каза болгон Кыргыз жарандын жакындары суракка алынып жатат

Москвада метродо рельске кулап түшүп каза болгон 16 жаштагы Кыргыз жарандын жакындары учурда Тергөө комитети тарабынан суралып жатат. Бул тууралуу SUPER.KG'ге Москвадагы Кыргыз диаспорасынын өкүлү Улан Кошматов кабарлады.

"Рельске кулап түшүп каза болгон 16 жаштагы Б.Асановдун жакындары Тергөө комитетинин Москва шаары боюнча башкармалыгы тарабынан суракка алынып жатат. Сөөктү Кыргыз жерине жөнөтүү маселеси каралып жаткан, бирок ал азырынча чечиле элек", - деп айтты Кошматов.

16 жаштагы Б.Асанов аттуу Кыргыз жараны 1-февраль күнү "Сходненская" станциясында рельстердин ортосуна кулап кеткен. Асановдун кырсыктан баш сөөгү жабыркап, сан сөөгү сынган жана денесинин бир нече жеринен жаракат алган. Дароо ооруканага жеткирилип, бирок жандандыруу бөлүмдө көз жумган.

Маркум Б.Асанов Жалал-Абад облусунун Сузак районуна караштуу Октябрь айылында 2003-жылы туулган. Алар үй-бүлөсү менен Москвада жашап жатышкан. Ал 4 бир туугандын экинчиси болгон.