Таиландда карыя таштап кеткен кызын күтүп 10 жылдан бери жол жээгинде отурат

Таиланддагы аскер кызматкери социалдык тармактагы баракчасына Бангкокто таштап кеткен кызын күтүп жүргөн карыя тууралуу жазганын чет элдик басылмалар маалымдоодо. Анда жазылгандай, Порамет Мисомфоп аттуу аскер кызматкери 30-январь күнү шаардагы кафелердин биринен түштөнүү үчүн бара жатып ал адамды көрүп калган. Андан кийин көпкө чейин жолдун четинде жалгыз отурган карыяга көз салган. Ал адамдын чоо-жайын билүү үчүн ошол жердеги дүкөндөргө кирип, ал тууралуу маалыматтарды сураштыра баштаган.

Ага карыянын үй-жайы жок экенин, бир нече жылдан бери күн сайын ошол орунга келип отура берерин айтып беришкен.

"Мындан бир нече жыл мурун унаа айдаган кыз ушул жерге токтоп, карыяны түшүрүп кеткен. Карыянын өзүнүн айтымында, ал анын кызы, иштеп кайра келем деп айткан экен. Эртеси мен дүкөндү ачканы келсем карыя ошол ордунда отуруптур. Кызы ошол бойдон кайрылган эмес. Ал эми карыя кызын өтө сабырдуулук менен күтүп келет. Ал кызынын келишине ишенет, ага тамак-аш берип турам", - деген дүкөндүн ээси.

Ал эми аскер кызматкери өзү карыяга барып, жардам сунуштаганда ал, "кызым жакында келет, ал жакында кайтып келет", "Кайтып кел" деп өзүнчө күбүрөнүп койгон. Андан кийин ал карыянын сүрөтүн интернетке жарыялап коомчулуктан кызын табышууну өтүнгөн.