Бишкекте волейбол боюнча Өлкө чемпиондугу старт алды

Бишкек шаарына волейбол боюнча эркектер арасында өлкө чемпиондугу старт алды. Бул тууралуу Жаштар иштери, дене тарбия жана спорт мамлекеттик агенттиги билдирди.

Маалыматка ылайык, кечээ, 4-февралда Бишкек шаарындагы Каба уулу Кожомкул атындагы спорт ордосунда Жогорку жана Улуттук Лиганын эркектер арасындагы 21-Өлкө чемпиондугу старт алды. 2019-жылда чемпиондук үчүн Жогорку Лигада 10 команда жана Улуттук Лигада 8 команда күч сынашат.

Мелдештин жыйынтыгында Жогорку Лигада алдыңкы 2 орунду ээлеген командалар Улуттук Лигага өтсө, Улуттук Лигадагы 2 арткы команда Жогорку Лигага өтөт.

Өлкө чемпиондугу үч айлампада өтүп, анын жыйынтыгы менен жеңүүчүлөр аныкталат. Экинчи айлампа 4-10-март аралыгында, ал эми үчүнчү айлампа 22-28-апрель аралыгында өтөт.

Жогорку Лигада ойногон командалардын тизмеси:

• Аксы;
• Ала-Бука;
• Бапа-Барскоон;
• И.Арабаев атындагы КМУ “Билим”;
• Бүркүт;
• Кадамжай;
• Салам-Алик U17;
• Сары-Өзөн;
• ОшМУ университети
• “Энергетик” Кара-Көл шаары.

Улуттук Лигада ойногон командалардын тизмеси:

• Жаңы-Муун;
• Сулайман-Тоо;
• Улар;
• Теңир-Тоо;
• EREM;
• Салам-Алик;
• Ош Бажы;
• Отор.