Кырк чакты журналист министр Кашкар Жунушалиевге нааразы болду

Бүгүн, 5-февралда Ички иштер министрлигинин жетекчилеринин маалымат жыйынында кырктан ашык журналист суроо берүүгө үлгүрбөй калып нааразы болду. Жыйында суроолор ИИМдин басма сөз кызматы алдын ала даярдаган тизме аркылуу берилип жатты. 2 саатка созулган жыйында болгону 16 журналист суроо берсе, дагы кырктан ашык журналистке суроо берүүгө убакыт жетпей калды. Суроо берген журналисттердин көпчүлүгү өкмөткө караштуу ЖМКлар болду.

ИИМдин басма сөз катчысы Бакыт Сеитов журналисттерди туура түшүнүү менен абалды оң кабыл алууга чакырды.

"Жалпы алтымыштан ашык журналист келди. Суроо берүүгө каттоого алынгандардын ичинен 16сы гана жетишип калды. Туура түшүнүңүздөр. Кандай гана суроо болбосун комментарийлерди берүүдөн биз баш тарткан эмеспиз. Жооп алууга жетишпей калгандар сурооңуздарды бизге жиберсеңиздер биз жооп беребиз", - деди Сеитов.

Белгилей кетсек, ИИМ жетекчилеринин буга чейинки маалымат жыйындарында кол көтөргөн журналисттер суроо беришчү.