Депутат: "Топтолуп алып тамеки чегип, түкүрүнгөндөр жок болуп калганын базар аралап жүрүп байкадым"

"Базар аралап жүрүп байкаганым - мурункудай топтолуп туруп алып тамеки чеккендер, түкүрүнгөндөр жок болуп калыптыр" деп бүгүн, 5-февралда Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин жыйынында депутат Камчыбек Жолдошбаев айтты.

Бүгүн комитет жыйынында “Эреже бузуу жөнүндөгү кодекске өзгөртүүлөрдү киргизүү тууралуу” мыйзамынын долбоору экинчи окууда каралууда.

"Мен базар араладым, байкаганым - мурункудай топтолуп туруп алып тамеки чеккендер, түкүрүнгөндөр жок болуп калыптыр. Тамеки чеккендер жашынып чегип калыптыр. Эл түкүрүнгөндөн коркуп калыптыр. Демек, мыйзам иштеп жатат, артка кайтуунун кереги жок. Талкууга алып жаткандардыкы, балким, туурадыр, бирок мыйзам өз натыйжасын берүүдө. Топтолуп турган милиция кызматкерлеринин жанына барып да сүйлөштүм, айланасы таза экен. Учурда эл эле эмес, милиция кызматкерлери да түкүрүнгөндөн коркуп калышыптыр", - деди Жолдошбаев.

Вице-премьер-министр Жеңиш Разаков бул мыйзам боюнча бир гана мекеме көзөмөлдөшү керектигин айтты.

“Механизмдер мурдагы эле. Түкүрүк боюнча күбөлүк база түзүлөт, ага ылайык айып пул салынат. Бул боюнча патрулдук милициянын кызматкерлери жана патрулдук күзөт кызматы иш алып барат", - деди Разаков.