Бишкекте жол кесилиштерине орнотулган камералар 7 эреже бузууну каттап, айдоочуларга 6 күндөн кийин айып салып баштайт

Бишкектеги унаа жолдордун кесилишине орнотулган камералар айдоочулардын эреже бузуусун каттоого алып, айып пул жаза баштайт. Бул тууралуу ИИМге караштуу Жол коопсуздугун камсыздоо башкы башкармалыгынан кабарлашты. Маалым болгондой, 12-февраль күнү "Коопсуз шаар" долбоору ишке ашырылат.

Анын алкагында Бишкектеги унаа жолдордун кесилишине орнотулган камералар жол кыймылына байланыштуу 7 эреже бузууну каттоого алмакчы.

Алар:

1. Жол чырактын кызыл белгиси күйүп турганда өтүп кетүү;

2. Каршы тилке менен жүрүү;

3. Тротуар, веложол, газон жана жөө адамдар өтүүчү чийимдер менен жүрүү;

4. Жол чырактын кызылы күйгөн учурда стоп сызыгынан өтүп кетүү;

5. Жөө адамдар өтүүчү сызыктан эреже бузуу;

6. Ылдамдыктан ашырып айдоо;

7. Аялдама жана унаа токтоочу жайда эреже бузуу.

Жогоруда көрсөтүлгөн эреже бузуулар боюнча сүрөт жана видеотасма иштелип чыккандан кийин унаа ээсине айып салынганын билдирген токтом жиберилет.

"Коопсуз шаар" долбоорун ишке ашыруу 4 этап менен жүрөт. 2-этап ушул жылдын март айынан башталат.

2019-жылдын 10-февралына чейин видеокөзөмөл камералар орнотула турган даректер:

Бөкөнбаев-Абдрахманов;

Жибек Жолу - Жаш Гвардия бульвары;

Чүй-Фучик;

Чүй-Бейшеналиева;

Жибек Жолу-Фучик;

Чүй-Жаш Гвардия бульвары;

Жибек Жолу-Абдрахманов;

Чүй-Курманжан датка;

Москва-Абдрахманов;

Горький-7-Апрель көчөлөрүнүн кесилишине коюлуусу пландалууда.